HOLONG NI
ROHA
Hagogon ni holong ni roha. Sada hata
nadenggan do on. Molo dang alani holong ni roha, masihosoman ma sude jolma,
akka bada ma na tubu, jala hajahaton ma parbuena. Alani holong ni roha ido
umbahen na boi mardame, boi rappak hundul, rappak mekkel jala olo masiurupan. Molo
holong do rohatta tu sasahalak jolma, dang pasombuotta ibana punjung sasadasa
molo masa habot ni roha. Na tau urupatta do i nasa tolap ni gogotta. Dang
tarbahen mangurupi sian materi, nanggo apala gogotta talehon. Dang tarbahen
mangalehon gogo, nanggo apala tangiang talehon. Saluhut na i marlaba do.
Sipata dang boi ta dok holong ni rohatta tu
dongan jolma. Maol do ulahonotton i. Alai sian parulaonta dohot pangurupionta,
tarida do naholong rohatta marnida dongatta. Sian pamerengta, boi do tarida na
holong rohatta tu dongatta.
Di sada tikki, laos so marningot ma au na so
hubuan doppethu hape na naeng turun nama sian oplet. Hatiha i, na borhat tu
parkarejoan do au. Mangido pangurupion ma au tu sada ina di bagas oplet i. Paula
so dibege inatta i do hatakku. Suda ma au diburai supir i. Didok ma au
pangoto-otoi. Ala ni hasalaanku, hujalo ma hata i.
Diloas supir i ma au haruar nang pe saotik
hulean ongkoshu ala pas adong solot par saribuan di tas hu. Ala ikkon maroplet
do au muse sahali nai, tamba ma holsokku. Dang huboto sian di dapothu hepeng
laho manggarar ongkos. Manaili ma au tu hambirang nang siamun. Marnida atik
adong pangurupion.
Hudapothon ma sada kode na metmet. Juppangku
ma di si sada natua-tua. Mamittor hupaboa ma holsokku. Disukkun amatta i ma
halak dia au. Laos hupaboa ma boru batak do au. Dang sian rohakku na
mangido-ido. Alani na tinggal do dompet umbahen na apala ro au mangido tu
amatta i. Burju ni rohani amatta i pintor didadap ma sakku ni salauar na. Dilehon
ma sappulu ribu hape lima ribu do hupangido. Dang dijua hatakki alai dilehon do
lobi sian na hupangido ala diida tulus ni rohakku.
Huingot ma na boi au manjual pulsa ni hp. Hujalo
ma nomorni amatta i asa huisi pulsana ganti ni uang naung hujalo i. Alai dijua
do.
“Namangalehon do au. Ias do rohakku. Tulus ma
dalani dalanmu” ninna ma.
Nung hudok mauliate, mijur ma au sian kode na
i. Huhut hudok dibagas rohakku asa diramoti Tuhan amatta i dohot keluargana. Ai
tung maccai balga ma holong ni roha ni amatta i. Jala dang mangido balos ibana.
Akka sisongoni ma nian taula. Asa dame
ngolutta. Sonang tahilala. Masiurupan di akka na hurang. Boi do ulahontta i? Di
rohakku boi do.
Tidak ada komentar:
Posting Komentar