HOLONG NA MANGOLU
Manghaholongi
dongan tudos songon manghaholongi diri sandiri. Saluhut halak ikkon sarupa do
bahenon. Natoras, haha anggi, dongan magodang, akka na matua nang pe dakdanak
ikkon do haholjongan. Tudia pe mangalakka, poda on ikkon do buanon jala
ulahonotton. Alana holong i ikkon torus do mangolu di bagas roha.
Nang pe humurang hita di rupa nang arta,
mamora do hita molo mangulahon holong hita tu saluhut dongan jolma. Jala unang
sai niulahan akka na jat. Asa unang tarsilandit iba dibaen hajahaton ni daging.
Unang hita marsak molo holong na tabahen i marbalos dohot naroa. Taargahon ma
holong na dirohatta i asa akka holong na arga na ro tu hita. Ai na sinuan i do
sitapuon.
Tudos tu na manuan gadong. Ndada hunik na
tubu. Alai molo tubu pe hunik i, tambani pangomoan na marsuan-suanan ma i. Jadi
unang manolsoli hita di akka naung tasuan. Di ari marsogot martamba do i. Tung
hurang pe na tadapot, alani na hurang denggan do panuananta manang hurang
takkal na tabahen tu suan-suanan i.
Holong
dakdanak
Diingot hamu do uju dakdanak? Jot-jotan do
tubu bada dohot dongan saparmeamanta. Mardongan satokkin, marbada muse, sidung
i gabe dongan muse. Boi do masa sisongonon di akka namagodang rodi natua-tua.
Sidung marbada ba ikkon domu ma nian muse, unang sai akka sogo ni roha na
marurat di roha, alana boi do gabe panahit i tu hita. Olo do alani jut ni roha,
gabe tubu hata “Mardomu di tano na rara”.
Hata on marlapatan hamatean ma padomuhon nasida namarbada. Ai soada be holong ni roha. Maol mulak rohana. Maol
mangalehon jala manjalo hasesaan di akka hasalaan. Marsiadu mandok “ibana do nasala. Au na tingkos”
Godang do na mambuatton akka sisongonon sahat
tu na marujung ngoluna. Boi do dang masisisean dohot dongan sahuta, hombar
jabuna, nang rodi keluargana, suang songoni tu akka gelleng nang natua-tuana
holan alani na marsogo roha.
Taalo
ma akka sogo ni roha. Holong i ma taparorot di rohatta ganup ari. Asa tiur
torus aritta. Asa martua hita.
Tidak ada komentar:
Posting Komentar